اڄ جون خبرون 25 سيپٽمبر 2012

 اڄ جون خبرون 25 سيپٽمبر 2012

پيرجوڳوٺ (پيرجوڳوٺ آن لائين) گستاخ فلم خلاف پيرجوڳوٺ جي پرائمري اسڪول2 جي استادن ۽ سوين شاگردن جو احتجاجي مظاهرو، خبر موجب پيرجوڳوٺ جي پرائمري اسڪول 2 جي هيڊماستر سيد وليءُ الله شاهه راشدي جي اڳواڻيءَ ۾ استادن ۽ سوين شاگردن گستاخ فلم جي خلاف احتجاجي ريلي ڪڍي ريلي شهر جي مختلف چوراهن ۽ محلن کان ٿيندي پريس ڪلب پيرجوڳوٺ پهتي جتي استادن ريليءَ کي خطاب ڪندي چيو ته گستاخ فلم ٺاهيندڙن خلاف سخت کان سخت ڪارروائي ڪئي وڃي ۽ اهڙي فلم جي ڊئريڪٽر ۽ فلم ۾ ڪم ڪندڙ عنصرن خلاف سخت ڪارروائي ڪندي کين عبرتناڪ سزا ڏئي دنيا جي ڏيڍ ارب کان وڌيڪ مسلمانن جي غصي کي ٿڌو ڪيو وڃي ۽ موجوده حڪومت کي گهرجي ته جنرل اسيمبليءَ ۾ مسلمانن جي نمائندگي ڪندي اهڙو احتجاج رڪارڊ ڪرايو وڃي.  ريليءَ ۾ استادن عزيز الله نوحاڻي، ظهيرالدين گهمرو، ڄام علي ڪانهر، بشير احمد اڄڻ، عبدالغني لاکو ۽ ٻين پڻ ريليءَ کي خطاب ڪيو.

پيرجوڳوٺ (پيرجوڳوٺ آن لائين) پيرجوڳوٺ جي ڪنگري محلي ۾ نامعلوم چور دڪان جا تالا ٽوڙي لکين روپين جو سامان کڻي، خبر موجب آچر ۽ سومر جي وچ واري رات جو نامعلوم چور فنڪشنل مسلم ليگ پيرجوڳوٺ جي ڪنگري محله يونٽ جي جنرل سيڪريٽري بخش علي ميراڻيءَ جي ڪرياني جي دڪان جا تالا ٽوڙي 5 لک روپين جي ماليت کان وڌيڪ سامان کڻي ويا.  فنڪشنل مسلم ليگ سٽي پيرجوڳوٺ جي اڳواڻن سيد نجيب الله شاهه راشدي، محمد سليمان مڱريو، نديم حيدر چنه ۽ ٻين اهڙي واردات جي سخت لفظن ۾ ڪندي پوليس اختيارين کان گهر ڪئي آهي ته اهڙي واردات ڪندڙ جوابدارن کي جلد کان جلد گرفتار ڪري جوابدارن کي سخت سزا ڏئي متاثر سان انصاف ڪيو وڃي.

پيرجوڳوٺ (پيرجوڳوٺ آن لائين) تعلقي ڪنگريءَ جي ڳوٺ ٻاٻيهو خان شر جي رهواسين فنڪشنل مسلم ليگ ۾ باضابطه طور شموليت جو اعلان ڪري ڇڏيو، خبر موجب فنڪشنل مسلم ليگ اڳواڻن ايڊوڪيٽ مجيب الرحمان مهيسر، وڏيرو عاشق حسين مهيسر، جاويد علي مهيسر ۽ ٻين ڪنگريءَ جي ڳوٺ ٻاٻيهو خان شر ۾ ڳوٺاڻن سان گڏجاڻي ڪئي جنهن ۾ ڳوٺ جي چڱن مڙسن رئيس سونو خان شر، رئيس نبي بخش خان شر، بدرالدين شر برادري جي سوين ماڻهن سان پي پي ڇڏي فنڪشنل مسلم ليگ ۾ شموليت جو باضابطه طور اعلان ڪيو. ان موقعي تي اڳواڻن ڳالهائيندي چيو ته صوبائي نائب صدر سيد محمد راشد شاهه راشدي جي هدايتن تي عوامي رابطه مهم جي تيز ڪئي ويئي آهي ۽ علائقي جا چڱا مڙس پارٽي جي اعلي قيادت تي ڀرپور اعتماد جو اظهار ڪندي فنڪشنل مسلم ليگ ۾ شامل ٿي رهيا آهن.

پيرجوڳوٺ (پيرجوڳوٺ آن لائين) پيرجوڳوٺ ۾ مهراڻ ٽيچر ايسوسيئيشن تعلقي ڪنگريءَ جون چونڊون ٿي گذريون، صدر نثار احمد ابڙو چونڊجي ويو، خبر موجب پيرجوڳوٺ ۾ مهراڻ ٽيچر ايسوسيئيشن تعلقي ڪنگريءَ جي گڏجاڻي پيرجوڳوٺ ۾ ٿي گذري جنهن ۾ صدر نثار احمد ابڙو، سينئر نائب صدر محمد صديق ڦلپوٽو، نائب صدر ممتاز بانو ميتلو، جنرل سيڪريٽري ممتاز علي آريجو، ڊپٽي جنرل سيڪريٽري دلمراد جوڻيجو، نائب سيڪريٽري اقبال بانو مهيسر، خزانچي غلام مهدي مڱريو، پريس سيڪريٽري سيد قائم علي شاهه ۽ آفيس سيڪريٽري سڪندر علي ڦلپوٽو کي چونڊيو ويو بعد ۾ چونڊيل عهديدارن مٺائي پڻ ورهائي.

پيرجوڳوٺ (پيرجوڳوٺ آن لائين) وڏا ماڇيون جي يوسي سيڪريٽري اياز حسين سولنگي صحافين آڏو دانهيندي چيو آهي ته اشفاق احمد، اعجاز احمد سولنگي ۽ ٻين يوسي آفيس ۾ اچي عملي کي گارگند ڪرڻ بعد آفيس ۾ بڃ ڊاهه ڪئي ۽ نازيبه جمله  استعمال ڪيا ۽ هنن چيو ته سندن ڳوٺن مان برساتي پاڻي ۽ گندگي جو صفايو ٻن ڏينهن اندر نه ڪيو ويو ته ٻيهر يوسي آفيس ۾ اچي تشدد ڪيو ويندو، ڄاڻايل يو سي سيڪريٽري اياز حسين سولنگي، ڪلارڪ ممتاز علي سولنگي، عبدالخالق سولنگي ۽ ٻين چيو ته ڄاڻايل حمله آورن خلاف سخت ڪارروائي ڪري اسان کي تحفظ ڏنو وڃي. ٻئي طرف يوسي سيڪريٽري اهڙو اطلاع وڏا ماڇيون پوليس کي پڻ ڏنو آهي.

پيرجوڳوٺ (پيرجوڳوٺ آن لائين) پيرجوڳوٺ لڳ 10 ساله نينگر ڪاري ڪامڻ وگهي فوت، سندس امڙ کي بيهوشيءَ جا دورا، خبر موجب وڏا ماڇيون لڳ ڳوٺ سونو سولنگيءَ ۾ 10 ساله نينگر فرمان علي پٽ عبدالغني سولنگي ڪاري ڪامڻ جي بيماريءَ سبب خيرپور اسپتال ۾ فوت ٿي ويو آهي واقعي بعد سندس امڙ کي بيهوشيءَ جا دورا پئجي رهيا آهن ٻئي طرف سندس وارثن محمد ايوب سولنگي، علي ڏنو سولنگي، عبدالغني سولنگي ۽ ٻين سان تعزيت جو سلسلو جاري آهي. 

عبدالقدوس خلجي جي ٿورن سان...